۱۳۹۷/۱۱/۰۶  -   کد خبر: 20204
کلاه ءَ گوک وارت

نیزگاریں مرد ءَ دل داشت نه کت و کوکار ئی کت : واجه گـُـڑاں منی کلاه ءِ گـَپ چے بیت ؟

کلاه ءَ گوک وارت

هاتف سیستان و بلوچستان: گوئشنت که روچے دو مردم ءِ نیام ءَ اڑاندے ( جنجالے ) بیت و اڑاند ءِ سرا جنگ بیت انت .

 

یکے هَستگار و سیریں مردمے ات که نیزگاریں مردمے ءِ ڈگاری چیرجَتـَگ و واهُندی کتگ ات. دوئیں مرد ءَ مردم سِـیلینت و جتا کت انت و گوئشت انت که ملا ءِ کِرّ ءَ  په شَرعءِ جـنـَگ ءَ برو انت .

 

دوئیں مرد په آهانی شر عءِ جَـنـَگ ءَ ملای ءِ کـِـرّءَ شُت انت تاں که آهانی جنجال ءَ به گیشینیت و دادءَ حقدار ءَ به دنت .

 

نیزگاریں مرد ءَ جوانیں کلاهے وام کرت و په واجه ملایءَ بُرت و وتی شکایت ئی پیش کرت و چه واجه ملای ءَ دَزبندی ئی کت که آئی ءِ ڈگار ءَ که سرجمین مهلوک زانگ انت که همایی ءِ جند ءِ مِلک انت، همایی ءَ دَیگ به بیت و واجه ملا په راستی وتی شرعءَ به جَنت .

 

واجه ملا گوئشت : میریں بلوچ دلجم بئے که من هبرءَ په حقءَ گوئشاں وا چونائیا من وت هم زانگاں که اے ڈگار تئی میراث انت، تئی حق چون چه تو پُلگ و بَرگ بیت ؟

 

هستگاریں مرد هم گوں شیری گوکے واجه ملایءِ دروازگ ءَ اوشتات و دست و دروت ءَ چه رند شیری گوکءَ ملایءَ دات تاں ملای ءِ چکاں شیرے وارت بکن انت. رند ءَ ملای ءِ دیوان ءَ نشت و چه واجه ملا ءَ پهلّی ئی لوٹ اِت که چـِد و پیش واجه ءِ سلاماں نیاتکگ، بلے همے زیتاں وتی مالءِ دَهیـَک و پنچیـَک ءَ الّم کـَشّ اِیت و په واجه ملای کاریت .

 

ایدگه روچیں ، ملایءَ په نیزگار و هستگار ءِ شر عءِ جـَنـَگ ءَ مردماں مُچ کت و چه نیزگارءَ ڈگار ءِ سَـنـَد و کاگد ءِ لوٹءَ کت تاں پـَدّر به بیت که اے همایی ءِ ڈگار انت.

 

نیزگارءَ گوئشت : چون واجه ملا، اے ملک ءَ زانان دَنا کسے ءَ ملکیت ءِ کاگد هست انت که منا به بیت ؟… نیزگار ءِ هبر هنگت نه کـُـٹـِتـَگ ات که ملا آهانی شَرعءَ جَت و گیشینت که ڈگار هما هستگار ءِ جند ءِ ڈگار انت و نیزگار ءِ هُشکیں بُهتام انت …

 

نیزگار ءَ گوانک جَت : واجه ملا زانان تو مردماں جُست کت نه کن ئے و زانان شمئی هزگاریں هستگاریں مرد ءَ کجام کاگدے هست ؟

 

ملا پسّو دات : بلوچ من ترا پول کت، ترا کاگد نیست انت، همے په منی شَرعءِ جَـنـَگ و گِیشینگ ءَ بس انت.

 

نیزگاریں مرد ءَ دل داشت نه کت و کوکار ئی کت : واجه گـُـڑاں منی کلاه ءِ گـَپ چے بیت ؟

 

ملای ءَ پسو گردینت : کلاه ءَ گوک وارت !

انتهای پیام/20204

نظرات
دیدگاه های ارسال شده توسط شما، پس از تایید در وب سایت منتشر خواهد شد پیام هایی که حاوی تهمت یا افترا باشد منتشر نخواهد شد
ارسال دیدگاه

جدیدترین اخبار
محبوب ترین اخبار