بے تواراں توارے لوٹ اِیت زرد
بے کراراں کرارے لوٹ اِیت زرد
شَلگمینتگ هیال ءِ گِر اِلاں
شپ تھاراں گِدارے لوٹ اِیت زرد
کپتگاں بَرّ ءُ بِیدِهاں مرچی
باگ ءُ وشیں بھارے لوٹ اِیت زرد
گِیتکگیں گَم مُدام تالان اَنت
بیا کہ یک دردوارے لوٹ اِیت زرد
شگرب ءُ مگرب ءَ من ءَ ریپ اِینت
نوکیں رُژنے دوارے لوٹ اِیت زرد
پہ بلوچ راج ءِ کُنگُریں بچاں
تاسُپیں گمگُسارے لوٹ اِیت زرد
بانزلاں شھم بہ دات ڈیھ ءَ مئی
هنچوشیں شیرشکارے لوٹ اِیت زرد
پھک بہ کنت چوروانی ارسان ءَ
زانت ءِ واهُندے یارے لوٹ اِیت زرد
جمبراں شنز کُتگ دل ءِ آپریچ
بیا امیری کہ ھارے لوٹ اِیت زرد