آزمانک بلوچی زبانءِ رخشانی گالوارءِ لبزے کہ ایشی بزانت افسانہ یا شارٹ اسٹوری انت. آزمانک فکشنءُ کسہی لبزانکءِ یک بہرءُ شاہڑے گشگ بیت.
آزمانک تہرءُ بازیں تکءُ پہنات است انت کہ دیمترا آہانی بابتءَ گشادیءَ نبشتہ کنگ بیت. آزمانک بُنکی رنگءَ سے تہرءَ انت.بزاں بیانی،چیدگیءُ جاردی.
ڈاکٹر شاہ محمد مری ءَ وتی یک نبشتانک یےءِ تہا آزمانکءِ بابتءَ نبشتہ کتگ کہ آزمانک چہ آزمانءَ زورگ بوتگ. بلوچیءَ آسمانءَ آزمان گشنت. پمشکہ دیوتا،جنءُ پریانی کسہ آزمانک گشگ بیت کہ آہانی دوار جاہ آزمانءَ انت. ہمے آزمانی دیوتاہانی کسہ آنءَ آزمانک گشگ بیت.
گواچنی ڈاکٹر مریءِ گپءِ ریشگ گوں بلوچی یا کہ دگہ زبانانی متھالوجی ءَ انت. بزاں گیدی کسہ کہ زمانگاں دیوتاءُ جنءُ دیہہءُ پری آنی بابتءَ بوتگ انتءُ مردمانی ستک ہمیش انت کہ اے درست آزمانءَ نشتگ انت پمشکہ بلوچی آزمان نندانی کسہ آزمانک گشگ بنت.
دورءُ زمانگءِ ہمرائیءَ ہمک چیءِ لوٹ ءُ گزر اوں بدل نوان بوتگ انتءُ نوکیں دابءُ دروشمانی جامگ اش گورا مان لگوشتگ انت. زیکیں دیہہ بالادیں انسان مرچی اتکگءُ پنچءُ شش فٹءَ سربوتگ.
سائنسءُ ٹیکنالوجیءِ تینزگامیں دورءَ انسان انچو گَسی کتگ کہ نوں آئیءِ گورا اینچو وہد نیست کہ آ بہ نندیتءُ دراج بُرّءُ نہ کُٹوکیں گیدی کسہ گوش بہ داریت یا کہ بہ وانیت. ہمے سببءَ دیما ایرکنانءَ استیں دورءِ آزمانکءَ وتی بِیتکیءِ جار ماں جہانءَ تالان کتگءُ نوکیں دابءُ دروشم آں گوں دیما گام جنان انت.
چوش کہ زیکیں انسانءِ تبءُ مئیل،سوچءُ پکر،ستکءُ بھیسہ،لیکہءُ دیدانک دگر بوتگ انتءُ مرچی دگر انت. پمشکہ گوستگیں گیدی کسہ آنی سرحال اوں دگر بوتگ انتءُ مرچی دگر انت. نوں آزمانکءَ باز دیمروئی کتگءُ نوک نوکیں سرحالءُ جیڑہانی سرا نبشتہ بوہگءَ انت.