یک جنینے شت ءُ دانائیں مردمے یے گور ءَ گوشت ئِے منی لوگ واجہ منی سر ءَ سک ترند اِنت مدام زهر گر ایت من ءَ هبر ءُ هال کنت، واجہ من چی بہ کن آں ؟ تو من ءَ هنچشیں سوجے بہ دے داں کہ منی لوگ واجہ نرم ءُ آرام بہ بیت ، منی هبراں گوش بہ دار ایت ، گوں من ءَ شر بہ بیت.
مرد ءَ درائینت ءُ گوشت ئِے: تو یک کارے بہ کن چرے گریشگ ءَ یک ممے ( خرس ) رامگ بہ کن ءُ وتی لوگ ءِ دپ ءَ بیار، گڑا رند ءَ من ترا هنچشیں سوجے دیاں کہ تئی لوگ واجہ گوں ترا سک نرم ءُ مهربان بیت.
گڑا جنین ءَ کمُکے ناه زورت ءُ شت همے گریشگ ءَ، یک جاهے رس ات دیست ئِے مم ءِ پَد انت همد ءَ یک گاڈے یے ءِ توک ءَ شتگ، گڑا زال ءَ همے ناه گاڈ ءِ دپ ءَ ایر کت ءُ وت کمُک دیر شت ءُ نشت، کمُکے وهدے ءَ رند دیست ئِے مم چہ گاڈ ءَ در آتک ءُ آتک ناه ئِے وارت.
اے دگہ روچ ءَ زال ءَ دگہ کمُکے ناه زورت پد ءَ شت هما جاگہ ءَ همے ناه ئِے کمُک دیرتر ایر کت، مم پد ءَ در آتک ءُ آتک ءُ ناه ئِے وارت، چیزے روچ ءَ زال ءَ همے وڑ ءَ کت ءُ دانکہ کم کم ءَ مم ئِے رامگ کت ءُ لوگ ءِ دپ ئِے آورت، رند ءَ مم هنچش رامگ ءُ ساز بوت کہ هر روچ آتک زال ءِ گور ءَ ناه ءِ وارت ءُ آپ ئِے وارت همد ءَ وپت ءُ آلیٹ ئِے جت، متلب شر رامگ بیت.
نی زال شت پانگ ءِ هما مردین ءَ ءُ گوشت ئِے مم من رامگ کتگ انی منی لوگ ءِ دپ ءَ انت، نی وتی سوج ءَ بہ دے؟
مرد ءَ درائینت ءُ گوشت ئِے: اے نادانیں جنین تو بلاهیں ممیں رسترے چہ گریشگ ءَ رامگ کت ءُ لوگ ءَ آورت، گڑا تو چتور وتی لوگ واجہ ءَ رامگ کت نہ کن ئے، آئی دل ءَ وتی نیمگ آورت نہ کن ئے.