نادراھی گْوستگیں زمستان ءَ چہ بے مُرادیں

انچوشکہ ما دراہ وَ زان ایں کہ نی ئیں وھد ءَ سرجمیں گیدی چہ بے مُرادیں چین ءَ ودی بوتگیں کرونا ویروس ءِ نادرھی ءَ بیڑ ترینتگ ءُ اے ویروس ءِ نادْراھی ءَ بیست ءُ یکمی کرن ءِ ھما دیمروی کتگیں بنی آدم کہ ماہ ءُ استالاں سر بوتگ انت، آیاں را اے پیش داشت کہ تو وَ انگت ءَ دیمروی نہ کت بلکیں انگت ءَ بنی آدم ءَ پہ لس مھلوک ءِ ھزمت گیشتر کار کنگی انت۔

مرچی ھر وڑیں بُنکی آسراتی ءَ سر ریچیں امریکہ، اِٹلی، سپین ءُ میان اُستمان ءِ وڑ وڑیں امیر استان چہ اے ٹوھیں نادْراھی ءِ دیم ءَ بے وس ءُ بے وانک انت۔ انچوشکہ دامگ ءِ تندجاہ ءُ گِندگُشاں یا توری روتاک ءُ وتگُشاں ما چارگ ءَ ایں کہ چہ اے سِلیں نادراھی ءَ بے کساس مردم، بزاں لکانی کچ ءَ نادراہ ءُ بیران بوتگ انت۔ اے انچیں نوکیں نادراھی یے کہ اے نادراھی ءِ زاھر کنگ ءَ لھتیں استاناں ساری ءَ ٹیسٹگ کِٹ اش نہ بوتگ انت پمیشکا تچکیں نادراھانی شمار ھچ کس نہ زانت کہ چُنت کچ ءَ بنی آدم ئِے نادراہ کتگ۔

البت اے نادراھی گْوستگیں زمستان ءَ چہ بے مُرادیں چین ءِ زَری ءُ کارجاھی شھر ووھان ءَ ودی بوتگ بلے بژن انت کہ اولی برے چین ءَ اے نادْراھی نہ منّ اتگ کہ چُشیں نادْراھی ءِ جِند نیست انت، وھدے اے نادْراھی ءَ بازیں مردم ئِے پیڑینتگ گُڑا چین ءَ اے نادراھی پہ لھتیں ھپتگاں  چہ میان اُستمانی راجانی چَمّاں  لِکّینتگ، انچوشکہ ایشی ءِ مستریں گواھی سی ءُ شَش سال ءِ ھُدامُرزی ڈاکٹر لی ویلنگ انت کہ رند ءَ اے واجہ وت چہ اے نادراھی ءَ بیران بوتگ ۔ سرسری اے نادراھی ءِ سرپدی ھُدامُرزی ڈاکٹر لی ءَ را بوتگ ءُ وھدیکہ ڈاکٹر لی ءَ ھمے نادْرانی تْرُندیں چِشَک، کلگ ءُ تپ گوں ساہ کَشگ ءِ تکانسری درمان ءُ دوا کنگ ءَ مار ات کہ ناشناسیں نادْراھی یے گُڑا ووھان شھر ءِ مردماں گْوشت ئِے کہ اے نادراھی ءَ مئے شھر ءَ گورجتگ نی وتی لوگاں بِہ نند اِت چمیشکا بلاھیں شھر یک بلاھیں تُرسے ءِ آماچ بوت۔

بژن انت کہ چین ءِ سرکار ءَ  زیت ڈاکٹر لی دزگِیر کتگ ءُ بندجاہ ءَ بندیگ کت ءُ رند ءَ تْرُندیں بیھار ءُ پاترپّ گوں اے مانزمانی ءَ یلہ ئِے کتگ کہ چد ءُ پد اے وڑیں پوتاری ءَ نہ کن ایں کہ اد ءَ کرونا ءِ ویروس ءَ گور جتگ۔ بزاں راستی چیردیگی اَت پد ءَ ڈاکٹر لی ھم چہ کرونا ویروس ءَ پیڑتگ ءُ چہ ویروس ءِ نادْراھی ءَ بیران بوتگ۔ البت میان اُستمانی جاندْراھی گل ڈبلیو ایچ او ءَ ڈاکٹر لی ءَ سُھریں سلام دات۔

اے گپ ءَ راستی انت کہ بد بھتیں چین ءَ اے ھال شِنگ نہ کتگ کہ مئے ملک ءَ کرونا ءِ نادراھی ءَ گور جتگ ءُ من اے کرونا ءِ نادراھی ءَ جنگ ءَ آں باید انت نی شُما ھم وت ءَ را پھریز اِت ءُ ایشی ءِ توجیلّے درگیج اِت۔ وھدے اے کرونا ویروس ءَ تیوگیں گیدی ءِ ھرگورے ءَ مردم پیڑینتگ انت پد ءَ زیت اے نادراھی ءِ تْرُوندی پدر بوت گُڑا دیر بوتگ۔ انچوشکہ اے نادراھی ءِ ھچ درمان ءُ دوا نیست انت۔ چوناھیگا ھما نادراھییانی درمان ٹھینگ بنت کہ بنی آدم ھما نادراھی ءِ پُژدر ءُ دپتر ءَ بِزانت بلے اے نادراھی ءِ جِند ءَ کس نہ زانت کہ اے نادراھی چونینے، ھُدائی ازابے یا بنی آدم ءِ ودی کتگیں نادْراھی!!

انچوشکہ یک ساچستے گْوش ایت کہ اے نادراھی ووھان انسٹیٹوٹ آپ وائرولوجی ءَ ودی بوتگ، وھدے چینی لشکر ءِ ڈاکٹر یک جانداری سِلاھے بائیولوجیکل ویپنے اڈ کنگ ءَ ات انت گُڑا اے گل ءِ ڈاکٹرے وت کرونا ءَ نادراہ بوتگ ءُ رند ءَ تیوگیں شھر پیڑینتگ ئِے۔ لھتیں گْوش ایت کہ اے چہ شپچراں درآتک، بزاں شپچرے چہ کرونا ءَ رِیکّگ ات گُڑا یکے ءَ ھما شپچر گوں دستاں گپت ءُ گراست ئِے پد ءَ چہ اے نادراھی ءَ شھر پیڑتگ۔

نی کَے بہ زانت کہ چے راست ءُ چے دروگ بلے گُڈسری گپ ایش انت کہ بلوچستان ءِ کِرّ ءُ کشاں اے ویروس ءِ نادراھی ءَ بازیں مردم نادراہ کتگ انت ءُ چوناھیگا بلوچ یک ایردستیں راجے کہ آئی ءِ وس ءَ ھچ نیست انت انچوشکہ ابرمی زیردستیں راجانی شھر ءُ دمگ ءِ راج مُدام بزگ ءُ گژنگ بنت، ناں کہ شَریں وانگجاھے بیت ءُ نیکہ گوں بُنکی آسراتیاں گوں شَریں نادراھجاھے بیت، انچوشکہ کہ زانتکاریں مردم وَ زان انت اے نادراھی ءِ دیمپانی ءَ بُنکی آسراتی دپوک انت گُڑا سرکار ءِ کِرّ ءَ ھمے دپوک ھم نہ بوتگ انت کہ بزگیں بلوچ راج ءَ بہ دنت اش، پد ءَ ٹیسٹنگ کِٹ وَ بلاھیں گپے۔

چوناھیگا چین ءَ لھتیں ٹیسٹنگ داتگ بلے آ دراہ آسراتی پہ کراچی ءُ پنجاب ءِ مردماں کارمرد بنت نیکہ پہ بزگیں بلوچ ءَ۔ البت ما بلوچ وَ زان ایں کہ اے نادراھی ءِ بلاھیں سِلاہ وت پھریزی انت۔ اگاں ما بزگیں بلوچاں لوگ پہ لوگ ءَ کرونا ویروس ءِ آگاھی بہ دے ایں کہ اے نادراھی چون پیڑین ایت ءُ ایشی ءِ پھریزی چے انت گُڑا ما وت ءَ چہ اے ٹوھیں نادراھی رکینت کت کن ایں

کرونا ویروس ویروسانی یک درُشمے کہ ایشی ءِ بازیں رنگ ھست انت بلے لھتین ئِے نادراھی ودی کنت۔ نوک پجّا آرتگیں ویروس بنی آدم ءَ ساہ کَشگ ءَ ژند کنت کہ COVID-19 ءِ نادراھی ءَ زانگ بیت
اے نادراھی ءِ لھتیں زاھری ایش اِنت

• تپ• دَمبُرگ ءُ ژندی • ھُشکیں کُلگ
ایندگہ زاھری ایش انت ئِے• ساہ کَشگ ءِ ژندی• دَرد ءُ تورشت • گُٹّ دَوری• باز کمیں مردم لاپ ریچ، پَشّانک یا لِمپُشک ءِ ھال دے اَنت۔

ھما مردماں کہ کمیں زاھری ھست بلے انگت جاندْراہ ءُ ڈڈ اَنت، آ وتی لوگاں ایوکی ءَ بِہ نِند اَنت ءُ وتی ڈاکٹر ءَ ھال ءُ اھوال بہ کن اَنت۔ھما مردماں کہ کلگ ءُ تپ یا ساہ ءِ کَشگ ءَ ژندی بوگ اِنت گُڑا زیت وتی ڈاکٹراں برو اَنت ءُ وتی پھریز ءَ بِہ کن اَنت۔

بلے  اے نادْراھی ماں پنچ پیم ءَ پِڑگ ءَ اوشت ایت

١-  ھر ساھت ءَ ما وتی دستاں بہ شود ایں۲ – وتی دیم ءَ دست مہ جن ایں، ھاسکن چَمّ، پونز ءُ دپ ءَ۳-  وتی دپ ءَ دپوک بِہ جن ایں، چِشَگ ءُ کُلگ ءِ وھد ءَ ما وتی باسک ءَ دپ ءِ دیمپان بِہ دے ایں کہ لِمپ ءِ تْرینزُّک شِنگ ءُ شانگ مہ بنت۔۴ – ما چہ مردماں کساس یک میڑ ءِ شملگ بہ ایں، کُلگ ءُ چِشَگ ءِ نادراھیں مردماں دِیر بِہ بَہ ایں۔۵ – نِند ءُ نیاداں مہ کن این ءُ بے سیتیں سپراں ھم مہ رو ایں بلکیں وتی لوگاں بِہ نِند ایں۔

بلوچ راج ءَ دزبندی انت کہ وت ءَ را اے کرونا ءِ نادراھی ءَ پھریز انت کہ اے نادراھی تیوگیں ھمساھِگ ءُ سْیاداں بلکیں سرجمیں راج ءَ ھم بے کساس تاوان دنت۔