اے بابت ءَ یک کسّہے چوش انت کہ یک مردمے ءَ پہ وت زاماتے دوست کت ءُ وتی جنکّ گوں آئی ءَ نکاح دات.
جنک ءَ مرد دوست نہ بیتگ ات، لوگواجہ ءَ ھم زانتگ ات کہ من جنین ءِ تب ءَ نیاں.
یکروچے یک ماھیگی یے ماھیگ بھا کنگ ءَ ات، آئی ءَ زِر ءِ مزنیں ماھیگ چوکہ اَھُور، گور ءُ دگہ گون ات بلے گوں ھمے ماھیگاں آئی ءَ تنکاپ (ھور،خور) ءِ ماھیگ ھم گون ات کہ ایشاں “ھوری ماھیگ” گشنت کہ چہ زِر ءِ ماھیگاں جون ءَ کستر انت ءُ تام ءُ لزّت ءَ ھم کمتر انت.
جنین ماھیگ والا ءِ کرّ ءَ اوشتوک ات، مرد ھم ھمد ءَ نزیک ءَ اوشتاتگ ات،جنین ءَ ماھیگانی نیمگا چارت ءُ گشت:
اِکّا اَھُور ءُ گوریں ماھیگ ءَ
سر منی ھوری پِٹـنے کپتگ
بزاں جنین ءَ بتل ءِ صورت ءَ گوں وتی مرد ءَ گشت کہ تو من ءَ دوست نہ بئے، بلے من مجبوری ءَ تئی گْور ءَ نشتگاں.