لالایی مادرانه برای خواباندن بچه در گهوراه خوانده می شود که به زبان بلوچی به آن لیلوک یا همان لالایی گفته می شود.
لیلو لیل مَنی بَچیگ ءَ
بَچیگ ءَ کَسان سالین ءَ
بَچیگ ءَ شَکَر گالین ءَ
دوشی بَچُّک ءَ باز گْریتَگ
اَرسان ئِے کَلَمپُر رِتکَگ
دُرّیں ھِکَّگاں مُروارِد
مات پہ بےگَمی واب کَپتَگ
شَھمیریں پِت ئِے زَھر گِپتَگ
بَچّیگ پہ مُراد نازینتَگ
سَرزاناں وتی نادینتَگ
دُکّانیں گْوَراں شیر داتَگ
سُھباں نیمَگ ءُ گْوَنگی نا
پہ پُلّیں واھَگے واپینتَگ
شاگیں گوانزَگ ءَ چَنڈینتَگ
پاساں چَندَنیں دار سُوتکَگ
بْوپس کہ واب تَرا رودین اِیت
بےوابی ترا رَنجین اِیت
شاگیں گْوانزَگ ءُ میدیں بَند
شاگیں گْوانزَگ تئی واب جاہ اِنت
میدیں بَند تَئی پاسپان اَنت
ھیرتیں کُچک تئی لَیبو اَنت
شاگیں گْوانزَگ چہ دارتْراشاں
ھیرتیں کُچک چہ آ گَوران ءَ
آروچی مَنی بَچّ بیتَّگ
بام ءَ داتَگ ءُ روچ بیتَّگ
کُلّ گوں گْوانزَگ ءَ شَھم گِپتَگ
آزیزّیں کَساں جَہ زُرتَگ
تاس گوں روگِناں شِنگ بیتَّگ
کُلّ ءَ را پُلے بَھر بیتَّگ
کُلّیں آلماں گَل زُرتَگ
کُلّ چہ آلِم ءَ پُرّ بیتَّگ
من چارشاھیں گُرانڈے کُشتَگ
پہ شاھی کاپَر ءِ دیوّان ءَ
بچیگ پہ تنَو رودینتَگ
لَھمیں گْریوَگاں سَھڑینتَگ
چوریگاں جَتَگ لَیبَیگاں
اللہ بَچّیگ ءَ پَھریزات
چہ مُلک ءِ کُلَّگ ءُ پَشّانکاں
وابے پہ سَلامَت بْیایات
گِرد ماں گْوانزَگ ءَ پِرتَرّات
بَچّیگ ءَ گِرات ماں چَمّاں
چَمّان ءُ بَزِیں بُرواناں
بَچّیگ رُد ایت ورنا بیت
مُلک ءَ اِزَّت ئِے بَرجاہ بیت
ھَر روچ گوں پِت ءَ اَمراہ بیت
سْیاھیں چوٹَوان رَند ایت
پاگے واجَھیگ بَند ایت
میری شان کَنت ءُ کَند ایت
سَکّیاں کَتار ءَ بَند ایت
پُلّیں پَتَّران نِند ایت
زُلمیں جِیڑَوان سِند ایت
لیلو لیل یَلیں بَچّیگ ءَ
ھَر دو دیدَگانی روک ءَ
چَمّ ءِ نُنُّک ءُ گِندوک ءَ
اَئید ءِ سَرشَپانی نوک ءَ
گَمواریں دل ءِ بَندوک ءَ
شوھازکار: آزات بےسَما