وتن ایران وتن مئی ساه ءُ جان اِنت

هاتف سیستان و بلوچستان،

وتن ایران وتن مئی ساه ءُ جان اِنت
وتن سرحد ءُ سیستان مَکُّران اِنت
وتن سیستان بلوچستانی بان اِنت
بلوچی مئی وتی شهدین زبان اِ نت
وتن تپتان وتن هامون ءُ هامین
وتن جیندی جاه اِنت تیز گامین
گِدام نِند ءُ سَواس دِرّ بُوْر شامین
وتن مئی هَمَّلی هَلک گُوْر نامین
وتن سَنگانی سول اِنتءُسراوان
وتن واشءُ شهیدان اِنت شَہ آوان
وتن پاکین پت ءُ ماتانی زان اِنت
وتن دُزآپءُ دُرّین پَهر ءُ شان اِنت
کُران وان هاپِز ءُ مُلایی مان اِنت
هَدیسءُ اِلمءُ زانتءَ شَرّءَ زان اِنت
وتن میرجاوه ءُ میرانی جاه اِنت
تمین ءُ تُربت ءُ تُرشابی ماه اِنت
کَهیر ءُ پارگی شیهانی شاه اِنت
پہ سِیدانی شکارهمشُوْرءُڈاه اِنت
وتن مِهرانی جاگہ بیرکی سُوْنٹ اِنت
وتن سورانی بَچّءُ مَچّی کُوْنٹ اِنت
وتن نیکشهر وتن لاشاری کُوْر اِنت
کَسِرکَند پَهره ءُ پنّوچی دوْر اِنت
وتن اِزم ءُ هنر دوچِ بلوچ اِنت
چو آسءَ دُژمنانءَ شَرّءَ سوچ اِنت
وتن بِنت ءُ سِبی بُرزین کلات اِنت
وتن بُنپورءُ مئی میراثءُمات اِنت
وتن جالکءُوتن بَمپشتءُگُشت اِنت
مئی پیرین پِتانی رَند ءُ پُشت اِنت
وتن میرکنبری سبزین سَگاراِنت
وتن مئی هانیءُ هلکءُ دَواراِنت
وتن راجدپتری شئر ءُ توار اِنت
وتن زِرگواتءُ گوریچءُ لَوار اِنت
وتن دردانی درمان جَرّءُ دار اِنت
وتن میر چاکری کوْل ءُ کَرار اِنت
وتن چهبارءُ جاسکءُ مادَر اِنت مئی
وتن سربازءُ سِبّی گُوادَر اِنت مئی
وتن پیشن وتن پُزم ءُ کُنارَک
جَتَگ جُوْرین بَدانءَ ما مہ نالک
وتن دشتءُ دَرَگ چو دشتیاری
میارجَلّی کَن اَنت باری پہ باری
وتن دِزَّک گو آ گَنجین دَران اِنت
وتن ناهوک گو آ هالگءُ بَران اِنت
وتن مَشکءُ وتن نَشکءُ نِگاران
وتن کلپورگانی کوزه داران
وتن مئی ماتءُ مئی براتءُگوهاران
چُلُمب ءُ چوڈی ءُ کیدان ءُ هاران
وتن مئی مادنین چهل کورهءُ بو
وتن لادیزی باگ ءُ ڈمِنی جو
وتن گوں نرمزاران نصرت آباد
وتن سبزین کِشاران مہ زر آباد
وتن ایرندگانی مَلّہ گان اِنت
برنج رون سال پہ سال مہ کَلّہ گان اِنت
وتن آباد چو پیر آبادی پَتّر
وتن تیموش تَگِردءُ جُلّءُ چَتّر
وتن پیردانءُ میروک اِزت اِنت مئی
وتن سَکّیءُ سوری لِذت اِنت مئی
وتن بی بگرءُ مهنازاِنتءُ مہ گنج
وتن سَسّی گِرانازاِنت ءُ سدگنج
وتن کربان پہ تو بات اِنت مئی جان
تَوئِے مئی میتَگ ءُ بادگیرءُ مئی بان
وتن وَشّک مئی دانکوک مئی دان
وتن مات مکہءُ مئی دین و ایمان
وتن مئی پیرءُمُرشد ما مُریدین
پہ اِئے هانی هَمُک ما شی مُریدین
وتن شهمیر شهیدان اِنت ءُ شیران
وتن پُلّین بلوچستان ءُ ایران